الكود الأول
شارلي بالدارجة 'charlie bdarija' شارلي بالدارجة 'charlie bdarija'
افضل قصص

آخر الأخبار

افضل قصص
recent
جاري التحميل ...
recent

الــديــــــانـــــة الــرائيليـــــــة "ديــــــﺎنــــة الفضـــــائييــــن"



واش عمرك تخيلتي واحد النهار تجي واحد الديانة مبنية على العلم والتكنولوجيا ؟ كنسمعو بالكائنات الفضائية..بعض المرات كانقولو بلي الفضائيين مكاينينش فالأصل كاينين فقط فدماغنا من خلال الأفلام لي كنشوفوها والأساطير لي كنسمعو عليها...ولكن واش عمرك تخيلتي مع راسك ان هاد الفضائيين يقدرو يكونو هوما سبب الخلق ويكونو هوما لي خلقو البشرية من خلال واحد التكنولوجيا حديثة وحتى هوما عندهم ديانة بحال الاسلام والمسيحية وغيرها...واش عمرك تخيلتيها ؟...تبع معايا...

من بعد مجموعة من الأديان لي هضرت عليها فالمواضيع السابقة اليوم غانهضر على ديانة من نوع آخر.."الديانة الرائيلية" هي ديانة فضائية بحال جميع الديانات أسسها واحد السيد بشري فعام 1973 هاد السيد سميتو "كلود موريس مارسيل فوريلون" تزاد عام 1946 ف فرنسا..هاد السيد كان مغني وكان صحفي فالضومين ديال السيارات الرياضية....هاد السيد فعام 1973 نزل عليه الوحي من عند الفضائيين باش يمشي يطلع لواحد البركان سميتو "بي دو لاسولاس" كاين فمنطقة "أوفرن" ففرنسا..."كلود فوريلون" من بعدما طلع للبركان تما غيتلاقى بواحد المخلوق سميتو "آفدي" هاد المخلوق شبه بشري جا من الفضاء كيتنامي لجنس الفضائيين لي سميتهوم"الإلوها"...موهيم دوز معاه شي 6 ايام تما..وانطلاقا من هاد اللحظة "كلود فوريلون" غاتولي سميتو "رائيل" لي كتعني رسول عند الفضائيين "الإلوهيم" (إلوهيم جمع إلوها)...

انطلاقا من هاد اللحظة غايولي "كلود" هو "رائيل" يعني رسول ديال الفضائيين وهو لي غاينشر ليهم الديانة ديالهم فوق الأرض وغادي يكتب واحد الكتاب سميتو "الكتاب الذي يروي الحقيقة" وكتاب "المخلوقات الكونية أخدتني إلى كوكبهم" (1974/1975)...ومن بعد واحد المؤتمر كبير كان عقدو "كلود" ففرنسا غادي يعرف العالم الديانة الرائيلية وغايتزادو الأتباع ديالها ففرنسا....أشنو هي الديانة الرائيلية وباش كتختالف على باقي الديانات ؟..

حل معايا دماغك..المؤمنين الرائيليين كيآمنو بلي المخلوقات الفضائية لي سميتها الإلوهيم هوما لي خلقو الحياة فوق الأرض وهوما لي دافعو على السلام البشري وكيآمنو بلي الإنسانية خصها تحقق واحد التقدم تكنولوجي علمي ومنطقي لي غايخلي البشر يكتاشفو الكون ويعرفو كولشي ماشي بالاستناد على الاديان لخرى..يعني يكون لاباز هو العلم والتكنولوجيا...الديانة الرائيلية كتقول بلي عن طريق العلم والتكنولوجيا غادي نخلقو حياة خرى فكواكب اخرى ونخلقو الحياة الابدية الأزلية عن طريق الإستنساخ وتغيير الجينات البشرية وأهم شيء هاد الديانة كتعارض الحروب ...

فالديانة الرائيلية مكاينش قس ولا فقيه كاينين مرشدين كيكونو فالكنائس الدور ديالهم هو يعلمو للناس طقوس التعميد وكيعلمو ليهم داكشي لي ديجا تعلموه من "رائيل" (كلود)...الديانة الرائيلية كتعتامد على الفلسفة من ناحية الزمن والكون وبالضبط الفلسفة لي كتقول ان الكون اللانهائي معندوش المركز وبناء على هذا كيقول "رائيل" (رسول الديانة الرائيلية) كيقول "كل شيء هو كل شيء" ...يعني فكل ذرة فالكائنات الحية كاينين ذرات خرين كيتكونو منهم كائنات حية وحدة خرى..ونفس الشيء بالنسبة للكون يعني كون داخل كون آخر...الرائيليين كيعتاقدو بلي غايخلقو حياة خرى ملي يتحقق السلام فالعالم بين البشرية وتحبس الحروب ويحبس القتل والعنف داكشي علاش كيعارضو الحروب وكايدعيو للسلام...ديك الساعة غايقدر البشر يسافر عبر الكون وعن طريق استخدام الإستنساخ وتغيير الجينات البشرية وهكا غادي نخلقو حياة خرى وغادي نستغلو الكواكب لخرى ونخلقو فيها الحياة بالاضافة للإعتماد على الهندسة المجتمعية لي غاتخلينا نخلقو أنواع من الحياة لي غاتكون مستدامة المعيشة...

الرائيليين كيآمنو بلي قدما قدرو يطورو الحواسيب ويطورو تقنيات عالية فالتكنولوجيا غادي يستاطعو يطبقو الاستنساخ على البشر وغايحولو الذاكرة والجينات ديال البشر للأجساد المستنسخة الشيء لي غايخلي البشر يبقى عايش واخا الجسد ديالو ميت..يعني من خلال الاستنساخ غادي نخلقو جسد مادي آخر ونحولو ليه الذاكرة والجينات ديال الجسد الميت وهكا الانسان كيعاود يحيى وكيبقى خالد مكيموتش وبنفس الطريقة غادي نخلقو أجساد خرى لي غادة تخدم عند البشر... وكيآمنو بلي الفضائيين الإلوهيم عندهم قدرة يرجعو الانسان للحياة من خلال نقل الحمض النووي ديالهم..وهادشي لي غايوقع فالنهاية ديال العالم يعني ملي غيموت البشر كاع دوك لي كيآمنو بالديانة الرائيلية غيرجعو للحياة وغايعيشو خالدين فالكوكب ديالهم ودوك الأشرار لي مامآمنيش بالرائيلية غادين يتعاقبو...وحتى دوك لي مانافعين بوالو واخا هوما ماشي أشرار ماغديش يرجعو للحياة غايرجعو الرائيليين فقط...

الرائيليين مكيآمنوش بوجود إله ومكيآمنوش بالروح بحاللهم بحال الملحدين وبحال البوذيين كيآمنو فقط بإعادة الخلق العلمي لي من خلالو غادي نعاودو نحييو البشر وكيآمنو بلي من خلال تطوير التكنولوجيا غادي نقدرو نخلقو الجنة فوق الارض وبلي الانسان خصو يستمتع بالحياة بلا مايخدم ويضرب تمارة لذلك خصنا نطورو التكنولوجيا باش التكنولوجيا تقوم بكاع الاعمال لي كيقوم بيها البشر...

هاد الفضائيين الإلوهيم جاو لكوكب الأرض شحال هادي منذ آلاف السنين..جاو لهاد الكوكب باش يديرو اختبارات خلقية يعني يخلقو شي كائنات بعيدا على الكوكب ديالهم ووقع اختيارهم على كوكب الأرض...كوكب الارض ديك الساعة كان عامر بالماا كامل بسباب الغيوم لي كانت فكل مكان لذلك هاد الفضائيين جففو هاد الغيوم باش توصل أشعة الشمس لسطح الأرض...وهكا تنقصات نسبة المياه وخلقو القارات وخلقو بيئة صالحة للحياة وخلقو حياة فوق الارض لي غتكون متناسبة مع الجو الجديد ديال الارض من خلال الاعتماد على علوم الفضاء الشمسية والهندسة الجينية...ومن الاشياء الغريبة لي كيآمنو بيها الرائيليين هو ان الجنة المذكورة فكتاب التوراة كانت مختبر ديال الابحاث ديال هاد الفضائيين الإلوهيم فعمليات الخلق..وبلي سفينة نوح كانت مركبة فضائية وبلي لقاو فيها جينات استعملوها فاستنساخ الحيوانات وبلي الطوفان الكبير لي ضرب البشرية تسبب فيه واحد الصاروخ نووي سيفطوه الفضائيين الإلوهيم باش يقضيو على الحياة فوق الأرض...

"رائيل" رسول الرائيلية كيقول بلي الفضائيين الإلوهيم ديجا تواصلو مع 40 انسان فالماضي باش يكونو أنبياء ديالهم فوق الارض ومن بين هاد الناس : النبي موسى، إيليا، المسيح يسوع، بوذا، محمد عليه السلام، جوزيف سميث...الخ، وكيقول "رائيل" بلي المسيحية واليهودية والاسلام والبوذية والمورمونية كلها كاتسمى بالديانات الإلوهمية حيت نباثقات من الرائيلية، حيت هاد الديانات كتآمن بواحد النقطة مشتركة هي نهاية العالم ويوم القيامة او مايسمى بزمن تحقيق الرؤية فباقي الديانات..يعني كل ديانة وكل أمة غايجي داك النبي ديالهم باش يشفع ليهم فاللخر...نفس الشيء فالديانة الرائيلية حتى الفضائيين الإلوهيم غايرجعو للأرض وغايتجمعو فواحد البلاصة سميتها "سفارة" وهو ديك البلاصة لي طلبو من رائيل (كلود) باش يبنيها وهي لي غايتحطو فيها المخططات ديالهم وتما غادين يتحاسبو مع البشر...لي مؤمنين غيرجعو للحياة ولي كافر مغيرجعش...

بالنسبة للطقوس ديالهم عندهم واحد الطقس سميتو "طقس التعميد" أو "نقل المخططات الخلوية" هاد الطقس كيعلمو ليهم واحد الشخص كاهن رائيلي كايسميوه المرشد..هاد الطقس كايديروه 4 المرات فالعام كيفاش كيديرو ؟..كاتجي كتجلس كيمسحو ليك راسك بالماء وكياخدو لك بعض الجينات كايخليوها عندهم هي لي غيعتامدو عليها من بعد فعملية الاستنساخ، هاد العملية كايديروها 4 المرات فالعام حسب مواعيد محددة ...ايلا بغيتي تعتانق هاد الديانة اهم شرط عندهم هو متكونش كتنتامي لشي ديانة خرى وفنفس الوقت كايديرو وقفات ومعارضات ضد الحروب وضد الكنيسة الكاثوليكية وكيطالبو بتحسين الجينات والغريب ايضا كيطالبو بتغيير القوانين باش النساء يكشفو على صدورهم يعني يعريو صدورهم بحالهم بحال الذكور وكيديرو وقفات ايضا ضد التحرش على الاطفال لي كيديروه القساوسة الكاثوليك نسبة لأحداث عام 2002 ودارو حركات اخرين باش يحرضو الناس يرتدو على الاديان ديالهم ويعتانقو الديانة الرائيلية.....هادشي فشكال على العموم هادشي لي كاين...نتشاوفو فشي موضوع خر..

بقلــم: الـﺴـــــــﺎﻋــــﺮ
Gerard Lopez
بقلم : محمد الكارتي

بقلم : محمد الكارتي

مدون وكاتب عربي ناشئ يهتم بكل ما هو جديد في عالم الكتب و التقنية و هدفه الأول التعلم والتعليم في مجال العلمي والتقني .

Enregistrer un commentaire

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

عن الموقع

عن الموقع
موقع شارلي بالدارجة(charlie bdarija) من إنشاء الشاب المغربي محمد الكارتي 23 سنة هدفه إيصال المعرفة ومعلومات مفيدة لمتابعيه , ويسعى الموقع لطرح و نشر شروحات في جميع المواضيع المتعلقة بتاريخ البشرية وهذا هو إختصاص الموقع الأول , وهدفنا الأول والأخير هو إرضاء متابعينا لنكون متميزين دائما

زوار الموقع

زوار الموقع

إجمالي مرات مشاهدة الصفحة

جميع الحقوق محفوظة

شارلي بالدارجة 'charlie bdarija'

2017

الكود التاني