الكود الأول
شارلي بالدارجة 'charlie bdarija' شارلي بالدارجة 'charlie bdarija'
افضل قصص

آخر الأخبار

افضل قصص
recent
جاري التحميل ...
recent

قصتـــــي مـــع الإكتئـــــــاب" بــــــارت 10.


- ايمتى غاتقولي ليا اش واقع هنا ؟
- غدا مع العشية فالبلاصة الفلانية..
الغد ليه مشيت لديك البلاصة لي دارت معايا فيها جالسين كنهضرو شوية سولاتني قالت ليا: واش موافق على الهضرة ديال البارح أنك تقدر تكون معايا ؟
- وي ولكن خصني نعرف كولشي ومانبغيكش تخبي عليا شي حاجة..
- بغيت نصارحك ونقول ليك كولشي ولكن خغت توقع شي حاجة..وراك عارف الكبير كيف داير..
- واش متايقاش فيا ؟
- ماشي هكاك..انا تايقة فيك غير خايفة وصافي حيت ممنوع عليا نقول هادشي..
- كولشي غايبقى بيناتنا غير دوي..
- واخا انا غادة نقوليك كولشي، تصنت ليا، أول حاجة خصك تعرفها هي أنك داخل خلية إرهابية..الكبير كايمولوه ناس خرين باش يجمع الناس ويعمر ليهم ريوسهم ومن بعد كايسيفطهم لدوك الناس لي مكلفين لي فوق منو لي كاينين ف"جبهة النصرة" ولا "داعش" من طرف ناس خرين كاينين فتركيا...الكبير كايبقى يأثر فالناس ويشحنهم ومن بعد كايسيفطهوم لتركيا بالضبط لواحد البلاصة سميتها "أنطاكيا" حدا حدود سوريا وكايسيفط معاهم شي وراق لدوك لي غايتلقاو ليهم وكيدخلوهوم باش يعرفوهوم جايين من طرف الكبير ومن بعد كايدخلوهوم من "أنطاكيا" لسوريا من واحد الطريق تما حيت اصلا ماشي ممنوع انك دخل لسوريا يمكن لأي واحد يدخل ولكن بمجرد مايعرفوك غادي عند لخرين كايشدوك.. تما ف "أنطاكيا" كاينين قهاوي وفنادق خاصين بالمهاجرين لي غادين يجاهدو..كايتسناوهوم تما...الكبير كايسيفطهم على أساس يجاهدو فسوريا ولكن لخرين كايدوزوهم لداعش ولا للتنظيمات لخرى..وهادو لي كايسيفطهم الكبير كايتلقاو ليهم شي وحدين كايعطيوهم شي تيليفونات باش يعيطو ليهم شي وحدين خرين كايكونو دعاة سلفيين تابعين للتنظيم كيهضرو مع المجاهد لي غيلتاحق بيهم باش يتأكدو منو لايكون شي جاسوس ولا شي حاجة..وهاد الدعاة كاتكون عندهم خبرة كبيرة يعني كايكونو ديجا مشاركين فحروب الجهاد ومن بعدما كايهضرو معاه ويتأكدو منو كايقطعو معاه الهضرة..وهادو غالبا ماكيدوزو لا سطاج لا والو حيت نورمالمون كايدوزو سطاج فيه 3 شهور، ولكن كايدخلوهوم ديريكت لساحة المعركة وكايجربوهوم وكايحطوهوم فالصفوف اللولة وبعض المرات كاينفدو بيهم عمليات انتحارية باش يعرفو واش غايوفي بالولاء ديالو..وأهم شرط عندهم هو ماتقول لحتى شي حد شي حاجة وملي تسالي خدمتك يمكن ليك تسافر ولكن تسافر بوحدك ومتسافرش مباشرة انما تسافر من دولة لدولة عاد دوز لبلادك واللبس ديالك والفيزاج ديالك خصو يكون عادي ومايبانش عليك متدين وماتكونش كتهضر بزاف..تكون ديما ساكت وماتسول حتى حد وايلا سولك شي حد مادخلش معاه فالتفاصيل وملي كاتوصل عند المسؤول فالتنظيم خصك تهضر بالعربية الفصحى وتخبي الخوف ديالك..وفالمعارك مخصكش تشكي على شي حد قرى القرآن وصبر وصلي حيت ايلا بقيتي كتشكى كايقتلوك...لي خصك تعرفو هو انك فاش كتوصل تما قبل مادخل تجاهد كايغسلو ليك مخك مزيان وكايقولو لك حنا كنضمنو لك انك غادي تجلس حدا رسول الله عليه السلام فالجنة وغادي تزوج بحور العين وباش يعطيك الله هادشي خصك دير اي حاجة قالوها لك فإطار الجهاد فسبيل الله...وبالنسبة للسكنة والماكلة كولشي على حسابهم حتى الزوجة كايجيبوها لك تنعس معاها وكايخلصوك من الفوق...كانظن عرفتي كولشي دابا..ونتمنى هادشي يبقى بيناتنا حيت الكبير ايلا جبدتي معاه هاد الهضرة غادي يدير ليا شي حاجة...
أنا بكل صراحة ملي قالت ليا هادشي تخلعت واخا انا ديجا كنت شاك فهادشي..شوية سولتها وانتي اش بان لك فهادشي ؟
- انا..مابان ليا والو..
- يعني عاجبك هادشي ومقتانعة بيه ؟
- شوف اي حاجة ماكتختارهاش بالإرادة ديالك والقناعة ديالك عمرها ماغادة تعجبك..
- يعني انتي معاجبكش هادشي ومع ذلك كاديريه ؟..
- عبد الله بلا ماتبقى تعاود فالهضرة راك فهمتيني..
- شكون فارض عليك هادشي..واش الكبير ؟
- شوف هضرنا بزاف وهذا الوقت باش نمشي..تعطلت.
- اشنو مخبية عليا ؟..شوفي غا باش نكونو مفاهمين را مانقدرش نكون معاك ونتيق فيك مادام انك انتي كتخبي عليا ومتايقاش فيا...
- خصني نمشي..نخليك هاد الساعة..
- واش باك هو لي فارض عليك هادشي ؟
- عبد الله..بغيتك تعرف الكبير راه ماشي الأب ديالي غير كذب عليك...يتبع
بقلــم: الـﺴـــــــﺎﻋــــﺮ

بقلم : محمد الكارتي

بقلم : محمد الكارتي

مدون وكاتب عربي ناشئ يهتم بكل ما هو جديد في عالم الكتب و التقنية و هدفه الأول التعلم والتعليم في مجال العلمي والتقني .

Enregistrer un commentaire

التعليقات



إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

عن الموقع

عن الموقع
موقع شارلي بالدارجة(charlie bdarija) من إنشاء الشاب المغربي محمد الكارتي 23 سنة هدفه إيصال المعرفة ومعلومات مفيدة لمتابعيه , ويسعى الموقع لطرح و نشر شروحات في جميع المواضيع المتعلقة بتاريخ البشرية وهذا هو إختصاص الموقع الأول , وهدفنا الأول والأخير هو إرضاء متابعينا لنكون متميزين دائما

زوار الموقع

زوار الموقع

إجمالي مرات مشاهدة الصفحة

جميع الحقوق محفوظة

شارلي بالدارجة 'charlie bdarija'

2017

الكود التاني